Nesset legg opp til store investeringar på helsebygg, medan det ikkje er rom for vedlikehald på kommunehus og vegar. Folkebadet er foreslått stengt neste år.

– Einingane har fått stramme rammer, som kan gi einingsleiarane og andre tilsette hodebry når det gjeld å halde rammene. Rådmannen er særleg bekymra for vedlikehald av kommunal veg, der det er minimalt med midlar til drift og vedlikehald, skriv nessetrådmann Anne Grete Klokset i sitt framlegg til neste års budsjett.

Inntektssvikt og kutt

Rådmannen peiker på at svikt i kommunens inntekter som eigedomsskatt, konsesjons- og kraftinntekter, og auka finanskostnader, gjer at dei to åra som er igjen for Nesset som eigen kommune vert utfordrande. Vedtak om at tenestestruktur skal oppretthaldast denne tida, påverkar også driftsbudsjettet.

– Det vil mellom anna bety mindre pengar til vedlikehald av kommunale vegar og kommunale bygg, det kan bli færre delingstimar i skulen, og kutt i talet på lærar/assistent -stillingar, og kutt i kulturtilbodet.

– Ikkje rom for folkebad

Kultursektoren er foreslått med kutt i ramma, dette vil merkast mellom anna på kutt i tilbod om folkebad, ifølgje forslaget. I forslaget til budsjett er det ikkje midlar til folkebadet ut over 1. halvår 2018.

– Rådmannen finn ikkje rom frå opprettholde folkebadet ut frå dei knappe rammene, skriv rådmannen.

Auka eigenandelar

Rådmannen foreslår å auke eigenandelar innan pleie- og omsorg, generelt med 2 prosent, for trygghetsalarm auke på 10 prosent, og for dagsentertilbod på 30 prosent.

Trass i ein slik auke, vil satsane i Nesset kommune likevel ligge under satsane i Molde, skriv rådmannen.

Dårlege vegar

Når det gjeld kommunale vegar, er det berre rom for eit minimum av vedlikehald, trass i store behov. Tilstanden for fleire vegar vert skildra slik:

– Steinar stikk opp, og asfalt er i svært dårleg stand. Vegar er ikkje salta eller grusa i år, og er utan fall for å få unna vatn, som fører til utvasking. Dette vil i sin tur føre til auka kostnader for å få vegen i normal stand.

Store investeringar

Rådmannen legg til grunn vedtak kommunestyret har gjort om investeringar; det gjeld vedtak om ombygging av demensavdeling på sjukeheimen med budsjettramme på 63 millionar kroner, vedtak om nybygg for bufellesskap for funksjonshemma til 13 millionar, vedtak om brannstasjon i Eresfjord for 3,5 millionar, og vedtak om nytt reinseanlegg for vatn i Eidsvåg til 22 millionar. I tillegg er det planlagt nytt helsesenter med 16 omsorgsbustader, kontor for heimeteneste, legekontor, tannhelse og ambulanseteneste.

Dette er det sett av 123 millionar til over dei neste tre åra. Til saman er det foreslått investeringar på 84 millionar i 2018, 75 millionar i 2019, og 50 millionar i 2010.

– Viktig satsing

Rådmannen meiner det er viktig å komme i gang med bygging av nytt helsehus i sentrum.

Ved å samlokalisere tenester, vil Nesset kunne tilby brukarar av omsorgstenester eit godt tilbod, og tilsette eit godt fagmiljø, skriv rådmannen.

Lekk tak på kommunehuset

Rådmannen skriv i si vurdering at kommunehuset er i svært dårleg forfatning, og med store behov for rehabilitering. Mellom anna lek taket, og det må settast ut bøtter for å samle opp vatn. Både tak og ventilasjonsanlegg bør skiftast. Men på grunn av dei store investeringane som er vedtekne, og kommunens vanskeleg situasjon, er det ikkje funne rom for midlar til rehabilitering.

Formannskapet har budsjett og økonomiplan til behandling torsdag, medan kommunestyret gjer endeleg vedtak midt i desember.

Saka er først publisert på rb.nett