NVE arrangerer to offentlege møte om kraftleidningen Trollheim–Viklandet. Møta finn stad måndag 2. februar 2015 kl. 19:00 i kommunestyresalen i Sunndalsøra og tysdag 3. februar 2015 kl. 19:00 i kommunestyresalen i Surnadal.
NVE har motteke søknad med konsekvensutgreiing frå Statnett SF, om planar for å byggje ein ny 420 kV kraftleidning frå Trollheim transformatorstasjon i Surnadal kommune til Viklandet transformatorstasjon i Sunndal kommune.
Kraftleidningen som Statnett planlegg, er omlag 47 kilometer lang, og går i hovudsak langs same trasé som eksisterande 300 kV og 420 kV leidningar på strekningen. Eksisterande 300 kV leidning mellom Trollheim og Viklandet vil kunne rivast når den planlagde nye 420 kV leidningen er sett i drift.
På møta vil NVE orientere om sakshandsaminga av søknaden, medan Statnett vil orientere om kva det er søkt om og forventa konsekvensar.
Søknad med konsekvensutgreiing er på høyring no. Dokumenta er lagt ut til offentleg gjennomsyn i kommunane.