Meiner NRK gjer feil

Krev meir nynorsk til ungdommen.
Nyheter

- Det er positivt at NRK har klart å auke nynorskprosenten i mange av kanalane. Diverre heng NRK Super og NRK3 langt etter, og det er svært uheldig at dette går ut over barn og ungdom som er målgruppene for desse kanalane, seier Janne Nygård, påtroppande leiar i Norsk Målungdom, i ei pressemelding.

Nygård er misnøgd med nynorskmangelen i barne-TV-kanalen NRK Super og ungdomskanalen NRK3. Den nyss publiserte allmennkringkastingsrapporten avslører at sjølv om nynorskprosenten er på rett veg i dei andre NRK-kanalane, lid framleis dei mest ungdomsretta tilboda av overveldande bokmålsdominans.

- Dette er ekstra dumt fordi det er barn og unge som er inne i den mest kritiske språklæringsfasen, seier Nygård.

Norsk Målungdom gler seg over den samla nynorskframgangen i statskanalane, men meiner NRK har prioritert feil målgruppe. NRK får likevel ros av målungdomsleiaren for den samla framgangen.

- NRK har fått kjeft i mange år for ikkje å nå 25 %-kravet, så når dei no faktisk oppfyller kravet i fleire av kanalane sine, skal dei ha skryt for det.