Kleivapris til Trond Larsen

Klikk for større bilde

Surnadal-ordførar Mons Otnes gratulerer vantru Kleivaprisvinnar Trond Larsen. Han fekk prisen for mangeårig innsats for heimbygdas musikkliv. Foto: Magne Lillegård

Trond Larsen fekk Kleivaprisen for sin mangeårige innsats for musikklivet i heimbygda.

Då fylkesordførar Olav Bratland sa om prisvinnaren at; han med særleg dyktigheit og innsatsvilje har lagt ned eit stort og betydningsfullt arbeid som musikalsk leiar og primus motor, og dette har han gjort i nærare 40 - då skjønte kanskje Trond Larsen kven det var snakk om.

Uansett var prisvinnaren himmelfallen og måtte berre beklage at han ikkje hadde forbereidd ein takketale. Han var òg uviss på om han eigentleg hadde gjort noko for å fortene denne prisen. Det spelar vel liten rolle så lenge ingen andre deler denne uvissa.

Det vart sagt at han har vore aktiv musikar, og stilt villig opp for revy og teaterlag som pianist og orkesterleiar gjennom mange år.

Elles vart han framheva som kontrabassist både i Strykeorkesteret i Surnadal og i eigen gamaldanskvartett, som reiste land og strand rundt i mange år. Dei har for øvrig gjort eit vellykka comeback.

I kriteria for tildelinga er òg hans evner som pedagog med, der han har vist stor menneskekunnskap og tålmod. Mellom anna har han leia både Surnadal skulekorps og Surnadal Hornmusikk. Om han har lagt dirigentstaven på hylla, verkar han framleis som vikarlærar på piano og treblås ved Kulturskulen når det trengst.

I 1991 fekk han Norges Musikkorpsforbunds høgaste utmerking for dirigentar, og i heimbygda har han motteke Ungdomsarbeidets pris. Ingen blant publikum på Kleiva var vel i tvil om prisen var fortent.