Torstein gler seg

– Eg gler meg veldig til finalen, seier Torstein Snekvik.

Med songen «Svikter aldri igjen» skal han gjere sitt beste for å sjarmere publikum, og ungguten har allereie fått prøve seg på den enorme scena i Oslo Spektrum.

– Det å stå på scena i Oslo Spektrum gjekk faktisk lettare enn eg trudde, seier Torstein, som fortel at han ikkje er særleg nervøs før den store finalen.

– Eg var litt nervøs den første gongen eg skulle på scena i Spektrum, men no føler eg at eg har kontroll, seier han.

Torstein og dei andre deltakarane har denne veka vore igjennom mange prøvar, med både kamera, dansarar og stemmecoach på plass.

– Alt har vore perfekt på prøvane, seier Torstein, som fortel at han har fått tildelt same garderobe i Spektrum som heltane hans i Metallica brukte då dei var i Oslo.

– Det er stas at så mange store artistar har stått på scena her før, seier han.

Over 200 surnadalingar har bestilt billettar til finalen, og Torstein tykkjer det er stor stas at så mange tek turen til Oslo.

– Det er verkeleg kjempeartig at så mange kjem, motivasjonen vert endå større når eg har kompisar i salen. Det gjer at det blir artigare å opptre, seier han.

I tillegg til å synge sin eigen song skal Torstein vere med på å framføre felleslåta «Du er suveren». Den unge artisten innrømmer at han har sommarfuglar i magen før finalen:

– Eg er ganske spent, ja, smilar han.

Det er venta over 4000 tilskodarar på finalen, som kan sjåast på NRK1 frå kl. 19.55 laurdag kveld.

Her kan du lese mer om Melodi Grand Prix Junior.

Her kan du lese mer om Torstein - og kanskje skrive en hilsen til ham?