Terje Talgø var tydeleg i sitt bodskap da ha innleia på idedugnaden som grendeutvalet arrangert i Todalen ungdomshus måndag kveld.

Statistikken med innbyggjartala som grendeutvalet la fram for perioden 1999 – 2018 var slett ikkje lysteleg. For Surnadal er resultatet -537, for Todalen -96, men Nordvik kan skilte med +16. No er tida inne for å ta tak.

Terje Talgø innleia og fortalte om verksemda til Talgø, som det siste året delvis har flytta eller skapt 35 nye arbeidsplassar i Todalen. Det er Elementfabrikken og administrasjonen på Talgø MøreTre som

no er på plass i Todalen. Her går det føre seg ei skikkeleg opprusting – Talgø investerer 120 mill nye maskiner og ny teknologi både i fabrikken i Todalen og i Surnadal fram til 2020. – Det har vi gjort med ambisjonar om både nye arbeidsplassar og dermed å klare berge skulen i Todalen.

- Må ha bustader

Elementfabrikken til Talgø MøreTre er marknadsleiande på støyskjermar i dag – i tillegg produserast det hus, fritidsbustader, landbruksbygg og andre element. Det siste året har det gått føre seg omfattande opplæring i ny teknologi, både for konstruksjon, kalkulasjon og HMS-rutinar. Det er veldig viktig å følgje med tida og oppdatere seg – vi må passe på så vi ikkje blir eit B-lag

Talgø fortalte korleis utstyret blir brukt i produksjon, sal og kvalitetskontroll, og kor opptekne dei er av at det heile skal være berekraftig. Talgø er i dag ein betydeleg aktør i levering av byggelement til store deler av landet, men sjølvsagt mest i Midt-Norge. Responsen i marknaden gjer at Talgø faktisk planlegg enda ein elementfabrikk i lokalane Talgø har på Kvennset i Todalen. – Men vi må få alt på stell før vi no går vidare.

Skal vi få folk til å kome til Todalen så må dei ha arbeid – og så må dei ha ein plass å bu. Men før dei bygger bustad må dei faktisk få prøve om dei likar seg her i lag med oss. Derfor må vi ha bustader som kan leiast ut i ei «prøvetid».

Og dykk som sitt her er like mykje ansvarleg for å berge skulen som eg. Men å ta vare på Todalen det har Talgø jobba med i snart 120 år, og det skal vi fortsette med. Men vi som sit her no, må ta tak sjølve dersom vi vil ha tomter, husbygging, butikk og skule.

Fleire ungar

På møtet var ein del av tida sett av til gruppearbeid rund omkring borda i det fullsette ungdomshuset. Det store spørsmålet var kva møtelyden trudde som skulle til for å folk til å kome til Todalen for å busette seg?

Sentral svar var sjølvsagt arbeidsplassar, bustader, butikk, skule, attraktive bustadtomter, vervekampanje, meir bruk av Bordholmen og Todalshytta som miljøfaktorar, moglegheiter for spreidd bustadbygging utanfor bustadfelt og større aktivitet i sengehalmen slik at det blir fleire ungar var det også forslag om.

Vil møte kommunen

Både FAU og grendeutvalet arbeider parallelt med å utvikle bygda, og ønskjer møte med kommunen for å informere og forhandle, med tanke på å prøve å snu utviklinga. Dei fortel at elevtalet ved skulen er greitt dei neste 4 åra, men etter det ser det mørkare ut. Dette gjeld det no å prøve å bøte på med å skape bulyst for å ta vare på skulen.

På møtet vart det sett ned to arbeidsgrupper – ei som skal jobbe med å kartlegge ledige bustader for utleie eller sal og ei gruppe som skal jobbe med marknadsføring av bygda og moglegheitene som finnes i Todalen.

Elles er det vel ingen overdriving å seie at kommunen fekk det «glatte lag» for måten dei har takla mange av problema i grendene på, og da spesielt skulesaka. Fleire ga i «kampens hete» uttrykk for at dei følte at kommunen arbeider meir mot oss enn med oss. Til dette kommenterte Talgø - at den kampen kjem dei til å tape!