Innhaldet på dei 76 sidene er illustrert med over 250 foto.
Gründeren, skiløparen og lastebileigaren Hans Bævre (1903-1991) er vigd ein fyldig artikkel. Attåt bildrifta fabrikerte han ski, klehengarar og treskosolar heime i Nyhuså i Bøverdalen.
Ein annan produktiv nordmøring var kyrkjekunstnaren Ole Joensen Kolset (1722-1789). Ein fyldig 300-årsartikkel viser hans altartavler i Bremsnes, Frei, Mo, Grane og Alstahaug kyrkjer forutan andre store kunstverk. Etter alt å dømme var han fødd i Bøfjorden.
Boka fortel elles om klinkabåten, som no er verdensarv hos Unesco, om kyrkjeskuter rundt på Nordmøre, barndomsminne med fiskestong langs Surna, kaminproduksjon på Åsgard, kulturhistorie langs fjæresteinane, om skuta «Aurora» i ulike farvatn og om museumsgjenstandar med sterke historier.
95-årige Brit Sæterbø fortel om ei unik kulturhending: Ho og tre andre unge skreiv med stein kongehelsinga «Håkon 7» på toppen av fjellet Hjelmen i 1943 - som ordre til tyske fly om å halde seg unna!
Litt av kvart i årets «Gamle Nordmør» altså!