Open Gard er landbrukets årlege store familiearrangement, og bondelaget sin viktigaste døropnar mellom landbruket og folk flest. Dette er dagen alle kan kome på gardsbesøk for å bli betre kjent med bonden, matproduksjonen og livet på garden. Det er lokale bondelag som står bak arrangementa med god hjelp frå andre lokale landbruksorganisasjonar.
Ole Marvin Aarstad, Svanhild Kvernberg og John Helde i Nesset bondelag er glade for at arrangementet igjen kan leggast til Nesset. Det er 16 år sidan forrige gong det var invitert til Open Gard i Nesset. Den gongen var det Arnt Inge Ranvik som var vert.
Færre heiltidsbønder
Det er tre år sidan Ole Marvin Aarstad tok i bruk det nye fjøset på garden. Der er det robotmjølking på dei vel førti mjølkekyrne. Totalt er det 104 dyr i fjøset når alle er inne.
Det har minka kraftig på talet mjølkebønder også i Nesset dei siste åra. Aarstad, Kvernberg og Helde er mellom dei 25 heiltidsbøndene som framleis held stand. Talet på produserte mjølkeliter har auka sjøl om talet på produsentar har gått ned.
– Nesset er på sjetteplass i fylket når det gjeld levering av mjølk. Surnadal og Rindal ligg enda høgare opp, seier John Helde.
Dei tre heiltidsbøndene meiner uansett det er viktig at talet på heiltidsbønder ikkje blir lågare. Dei ser det som viktig at miljøet blir oppretthalde.
Mange dyr
Dei som kjem på besøk til Aarstad på søndag får stifte kjennskap med eit stort mangfald med dyr.
– Vi opnar fjøsdøra slik at folk kan gå inn i fjøset. Hit kjem det sau, høner, ender, kaninar og geit. Det blir og muleg å få prøve seg på hesteryggen. I tillegg er det lagt opp til at folk kan vere med på natursti og hesteskokasting. Alt utasnom msten er gratis. Den er det Norsk Folkehjelp som står for, seier Aarstad.
– Er skuleklassar og barnehagar spesielt inviterte?
– Nei, dei er ikkje det, men dei er sjølvsagt velkomne. Dette er eit arrangement for born i alle aldrar, smiler dei tre.
Molde Bondelag har også sitt arrangement same dag på Indre Årø gard med Svanhild og Wollert Dankert Krohn som vertskap.