– Eg ønska å trekkje bodene litt lenger vest for å få bruke gatene på gammal-Øra. Og det var dei andre i komiteen einige i, seier leiar i martnaskomiteen, Martinus Grimsmo.
Grimsmo rosar Gry Mikkelsen Tellesbø for jobben ho gjer med å lage nye kart over heile martnasgata med alle boder teikna inn.
Rundt 50 utstillarar fyller bodplassane på Surnadalsøra i år, blant anna inne på ei gammal brygge eigarane av Surnadal Billag har leigd.
Av utstilte objekt finn vi handarbeid, handverk, knivmakarar, saum, rosemåling, antikvitetar, velværeprodukt og treprodukt.
I tillegg finn vi produsentar av kortreiste matvarer, blant anna Sylte Gårdsslakteri og andre produsentar av lefser og anna bakverk.
– Vi har Barnas Torg der ungar får ta med seg leiker og anna dei kanskje har gått lei av og vil by fram for sal. Vi har også fått varsel om at russejenter kjem og vil selje kjeks, fortel Grimsmo.
I år som i fjor er hovudgevinsten i det store lotteriet ein El-sykkel, men du kan også vinne hagemøblar eller gåvekort av ymse slag.
Grimsmo er elles imponert over jobben det tidlegare styret i martnaskomiteen med Eldbjørg Flatekval i spissen har gjort og peikar på at det er enkelt å ta over som styreleiar når alt er slik på stell.
– Eldbjørg stilte ut i Billaget i fjor, men har i år ønskt å flytte utstillinga heim til Drengstuå galleri, der ho vil ha utstilling og sal av bilde med kjente motiv frå Øra, fortel han.
Som nemnt stiller Turid Mathiesen Kvålsvoll ut i Billaget, medan Ellen Hegg har si eiga utstilling i Øra Bedehus.
Rett over gata for Billaget finn vi Surna kunst- og design med Marianne Fjærvik og Tom Nyhus.
Men sjølve martnasgata blir stort sett å finne frå Hammerstuene og vidare vestover mot gammal-Øra.
I tillegg til at dei vil huse kunstutstilling i andre etasje, vil Surnadal Billag servere heimelaga fiskesuppe i lokala ut mot gata i første etasje.
I andre etasje er Turid Mathiesen Kvålsvoll begeistra over lokala ho skal stille ut i.
Det dreier seg til dels om svært store format, men ho har òg funne fram nokre eldre bilde som ho i utgangspunktet ikkje tenkte skulle vere med.
– I desse lokala får gamle måleri nytt liv, og her ser vi verkeleg at utstillingslokala blir del av kunsten, seier ho – og kommenterer at både romma og dei som jobbar med å lage til stativa måleria skal stillast ut på spelar på lag med bilda.
Tittelen på utstillinga er kanskje den lengste vi har høyrt: «Told you, an army of me» Art Attack #Dinnerparty. Så det så.
– Desse bilda vart til medan eg leita etter ein kunstnarisk ståstad, og berre måtte gjere noko med det, seier ho.
Berre ein ekte kunstnar vil kjenne behovet for å lage kunst ut av ei kjensle der vi andre ville gje opp, ta ein pause og gjere noko anna.
– Nokre av motiva vil kanskje verke provoserande på nokon?
– Ja? Kanskje det. Men eg har ikkje tenkt slik. Eg har først og fremst tenkt på måleriet og problematikken i det, seier ho.
Det er uansett ein spennande kunstnar og sterkt å anbefale å ta turen opp i andreetasjen på Billaget.
Laurdag kveld blir det bryggedans ved Hammerstuene til musikk av Ship of Fools og undervegs i martnan vil Trollheimsbrass musisere i gatene.