Vikesoksa og andre saker
I denne spalta går vi laus på nyåret med å hente fram eit innspel som har ligge heilt sia i fjor. Det gjeld det markante fjellet Vikesoksa, som ligg bratt opp og aust for Vike ved Eikesdalsvatnet. Heile 1809 meter høgt, og grensefjell mellom det som no er Molde og Sunndal kommunar. Før 1965 var det grense mellom Eresfjord og Vistdal i vest og Øksendal i aust. Høgste toppen ligg vel i Molde kommune. Eg har eit gammelt flyfoto frå Øksendalen, der ein greitt ser den karakteristiske toppen på Vikesoksa stikke opp over Slotet (”slö:te”). For dei spreke er det ein topptur som blir belønna med fantastisk utsikt. Namnet har også vore skreve Vikesaksa, men Kartverkets vedtekne form er Vikesoksa.