I samarbeid med Møre og Romsdal fylkeskommune har Sunndal og Surnadal kommunar utarbeida kommunedelplan (frå 2020) for fv. 670 Todalsfjordprosjektet. Hovedelementa i vedtatt plan er 4,2 km tunell frå Ålvundfossen til Rakaneset og 713 m lang hengebru over Todalsfjorden til Svinvika.
Gjennomføring av vedtatte kommunedelplanar vil medføra vesentlege arealkonflikter og tap av matjord m.a. på Ålvundfossen/Ålvundeid, Rakaneset, Svinvika og langs Nordvikstranda.
M.a. ut frå dette har Møre og Romsdal fylkeskommune gjennom Sweco Norge fått utarbeida ein rapport som vurderer undersjøisk tunell frå Ålvundfossen til Åsbøen. Rapporten viser at ein undersjøisk tunell vesentleg vil redusera arealkonfliktene og tapet av matjord, samt at investeringskostnader blir lavare og driftskostnader høgare enn det som er skissert gjennom vedtatte kommunedelplan.
Vidare oppsummerer Fylkesvegavdelinga i Møre og Romsdal fylkeskommune i «Notat Todalsfjordprosjektet» av 15.5. 23 ulike alternativ for val av fjordkryssing. Her blir det klart konkludert med at «Etter samanstilling og ei totalvurdering finn fylkeskommunen det mest hensiktsmessig å planlegge og byggje undersjøisk tunell som framtidig kryssing av Todalsfjorden. Det leggast mest vekt på god måloppnåing, sparte investeringskostnader og sparte arealinngrep.»
Likevel registrerer vi at Samferdselsutvalet i sitt møte 31.5.23, trass i fylkeskommunedirektøren si innstilling om å prioritera undersjøisk tunell, tilrår å gå vidare med prosjektet i samsvar med vedtatte kommunedelplanar i Surnadal og Sunndal.
Når no fylkestinget i juni skal gjera ei heilskapleg prioritering av alternativ for fjordkryssing, må vi klart minna om at føringane for å unngå tap av matjord og øvrige arealkonflikter er blitt langt sterkare enn det som låg til grunn i 2020 då kommunedelplanane for Todalsfjordprosjektet vart vedtatt.
Vi må særleg minna om at fylkestinget så seint som 12.12.2022 vedtok «Fylkesstrategi for landbruk i Møre og Romsdal 2023 – 2026». Her heiter det m.a. at det i Møre og Romsdal skal vera ei arealforvaltning som vernar dyrka og dyrkbar jord mot nedbygging og at maksimalt 100 da dyrka jord skal omdisponerast til andre formål kvart år. Om fylkestinget gjer vedtak om fjordkryssing i samsvar med noverande kommunedelplanar må ein rekna med at langt meir enn 100 da dyrka og dyrkbar jord vil bli omdisponert, noko som vil vera eit klart brot på Fylkesstrategi for landbruk i Møre og Romsdal.
Føringane i Fylkesstrategi for landbruk er også i samsvar med dei innskjerpingar som Stortinget har gjort i Oppdatert jordvernstrategi no i vår.
I tillegg må det også nevnast at ei rekke andre forhold og føringar tilseier at dyrka og dyrkbar jord må takast betre vare på for framtida. Dette gjeld m.a. bærekraftsmåla, naturavtalen, prinsippet om arealnøytralitet og klimaavtalen.
Det blir anslått at samferdselstiltak i snitt krev 1700 da jordbruksareal pr år i Norge. Dette må klart reduserast, m.a. gjennom at det for Todalsfjordsambandet blir gjort eit konseptval med undersjøisk tunell som reduserer arealkonflikter og tap av matjord.
Med helsing
Konrad Kongshaug, Møre og Romsdal Bondelag
Øystein Solli, Jordvern Møre og Romsdal
Atle Frantzen, Jordvern Møre og Romsdal